ბავშვის მიერ აღქმული თავისუფლება

ბავშვს რაც უფრო ავუკრძალავთ რამეს, მით უფრო მეტად მოუნდება „აკრძალული ხილი“. მისი წინააღმდეგობის უმთავრესი მიზეზი არის არა თავისთავად „აკრძალული ხილი“ არამედ მისგან აღქმული თავისუფლების წართმევის შიში. 

ნებისმიერი შეზღუდვის შემდეგ მივიღებთ ბავშვის საპასუხო რეაქციას. ეს არის მისი  გაუცნობიერებელი ლტოლვა თავისუფლებისკენ. ის ეწინააღმდეგება აკრძალვას და ამ ფორმით ანუ დაუმორჩილებლობით გამოხატავს პროტესტს  აკრძალვის მიმართ, რადგან ის ამას  აღიქვამს თავისუფლების დაკარგვის საშიშროებად,  რაც პირდაპირ კავშირშია მის ღირსებასთან. ამიტომ ჩვენი ქცევა-დამოკიდებულება არ უნდა იყოს თუნდაც ირიბი ბიძგი მათი ღირსება-თავისუფლების წინააღმდეგ.               

12  წლამდე ასაკი, არის  ბავშვისთვის  სწორი უნარებისა  და მანერების  ჩამოყალიბებისთვის ძალიან მნიშვნელოვანი პერიოდი. სწორ მანერებში და უნარებში იგულისხმება კეთილგანწყობის გამოვლინება გარშემო მყოფი ადამიანების მიმართ და პატივისცემის გამოხატვა არამატერიალური ფასეულობების მიმართ. 

ზოგადად, მადლიერების, სხვაზე ზრუნვის და თანადგომის გამოვლინება ხასიათის ისეთი ნიშანია, რომელიც სწორი აღზრდის შედეგად მოდის. 

ვეცადოთ დავანახოთ და ვასწავლოთ  ბავშვებს ისეთი ქცევა, რომელიც გაუმძაფრებს მათ ღირსების შეგრძნებას, თვითდაჯერებულობას და არ შეუქმნის საფრთხეს მათ თავისუფლებას. ბავშვის ბედნიერება დამოკიდებულია მისი თავისუფლების ხარისხზე.